N.B. – This was published in Pinoy Weekly (August 31, 2013), the full text of which may also be retrieved from http://pinoyweekly.org/new/2013/08/31-agostong-tanaga-ng-peryodista/.
August – the eighth month of the Gregorian calendar (Merriam-Webster app)
august – marked by majestic dignity and grandeur (Merriam-Webster app)
Agosto 1
Peryodistang makata
Nagpumilit tumula
May umakmang salita
Sa ritmo ng tanaga*
Agosto 2
Wala nang talinhaga
Para sa mambabasa
May mensaheng direkta
Ang kunyaring makata
Agosto 3
Ulat na mahalaga
Kailangang mauna
Maging masinop sana
Ang bidang peryodista
Agosto 4
May tanagang sinulat
Sa panahong tag-salat
Ayon kasi sa ulat
Walang pagkaing sapat
Agosto 5
Kalat ang kagutuman
Kapos sa kabuhayan
Kawawang kalagayan
Saan ka, katarungan?
Agosto 6
Saan nga ba ang daan
Papuntang katarungan?
Sana’y may kasagutan
Midyang inaasahan
Agosto 7
Ano ba naman ito?
Bakit kaya ganito?
Wala nang peryodismo
Puro lang eskapismo!
Agosto 8
Nagbabagang balita
Walang saysay na paksa
Panghatid lang ng saya
Pampataas ng kita
Agosto 9
Bangayan ng artista
Piging ng elitista
Pagandahan ng pusa
Ito ba ang balita?
Agosto 10
Puro lang kalokohan
Walang silbing tsismisan
Ganitong balitaan
Walang kahihinatnan
Agosto 11
Sa pagninilay-nilay
Nabubuhay ang saysay
Diwa’y sinasalakay
Ilusyon, pinapatay
Agosto 12
Kailangang matuto
Datos dapat kompleto
Kausapin ang tao
Lalo na ang eksperto
Agosto 13
Lipunang may pasanin
Patuloy na pansinin
Pagsusuring masinsin
Sana’y panatilihin
Agosto 14
Nang balita’y tumagos
Suriin po nang lubos
Hindi sapat ang datos
Sa pakikipagtuos
Agosto 15
Wag maging subhetibo
Gamitin ang talino
Isulong ang diskurso
Buuin ang konteksto
Agosto 16
Iulat ang totoo
Nang maging obhetibo
Lohikang bako-bako
Walang lugar sa mundo
Agosto 17
Ano’ng kinabukasan
Kung walang katuturan?
Pupunta sa kangkungan
Ang tulog sa pansitan
Agosto 18
Walang lugar ang mali
Sa sitwasyong tiwali
Batas na binabali
Para sa piling-pili
Agosto 19
Sila ang pinagpala
Sadyang nagpapasasa
Lipunang kontra-masa
Sila po ang gumawa
Agosto 20
Luhong tinatamasa
Luha para sa iba
Marunong bang mahiya
Silang ganid sa pera?
Agosto 21
Kung makapal ang mukha
Mabubundat ang bulsa
Aangkinin ang lupa
Kahit ng buong bansa
Agosto 22
Isulong, ipagkalat
Ito ang nararapat
Kailangang magmulat
Ang peryodistang tapat
Agosto 23
Balita ng nakawan
Ulat ng kababuyan
Nararapat tutukan
Ganitong kahayupan
Agosto 24
Kung nakakainsulto
Lalo na sa gobyerno
Wag pong magpapatalo
Gawin lang ang trabaho
Agosto 25
Mayroong pamantayan
Kung nais manindigan
Hangaring makabayan
Ituloy ang paggampan
Agosto 26
Kailangang isulat
Kagyat na isiwalat
Ulat na nag-uungkat
Tulang kayang magmulat
Agosto 27
Peryodistang may tindig
May laman ang pagtitig
Sa masa sumasandig
Malinaw ang pagpanig
Agosto 28
Peryodistang may maso
Makatang makatao
Ulat na may prinsipyo
Tulang taas-kamao
Agosto 29
Ulat ng aktibismo
Tanagang progresibo
Para sa Pilipino
Kahit na subersibo
Agosto 30
Konsepto ng agosto**
Dapat na isapuso
Marangal na diskurso
Susi sa peryodismo
Agosto 31
May dangal sa pagtula
Kahit hindi makata
Pagbati, peryodista
Tapos na ang tanaga
Malate, Maynila
Agosto 31, 2013
* Ang tanaga ay tulang binubuo ng apat na linya na may pitong pantig bawat linya. Ang makalumang tanaga ay may iisang tugma (AAAA). Pero sa modernong tanaga, hinahayaan na ang iba’t ibang porma ng tugma (halimbawa, AABB o ABAB), pati na ang malayang berso.
** Ang “august” sa wikang Ingles ay nangangahulugan ng “marked by majestic dignity or grandeur” (Merriam-Webster app). Bagama’t ang salitang “Agosto” sa wikang Filipino ay tumutukoy lang sa ikawalong buwan ng taon, ginagamit sa tulang ito ang “agosto” bilang direktang salin ng “august.”